احمد بن عباس بن حسین بن عیاض سمر قندی: بڑے فقیہ اور عالم فاضل تھے،علمائے ہمعصر میں سے کسی کی یہ جرأت نہ تھی کہ علم و کیاست اور تیزی طبع و پرہیز گاری میں آپ سے ہمسری کر سکت۔ابو نصر کنیت تھی۔آپ کی نسل سعد بن عبادہ انصاری خزرجی صحابی سے ملتی ہے اور عیاض آپ کے اجداد میں سے کسی کا نام ہے جس کی طرف آپ منسوب ہیں۔

          آپ سمر قند میں رہتے تھے،فقہ آپ نے ابی بکر احمد بن اسحٰق جوزجانی تلمیذ ابی سلیمان موسیٰ جوزجانی سے اور آپ سے آپ کے دونو ں بیٹوں ابو احمد نصر عیاضی اور ابو بکر محمد عیاضی اور جماعت کثیرہ نے استفادہ کیا۔آپ کے چالیس سے زیادہ اصحاب تھے جو اپ کے حکم سے ہر جمعہ کو مع جملہ مشائخ و علماء و قاریوں کے بہ ہئیت مجموعی بازاروں وغیرہ م یں گشت کیا کرتے تھے،کسی نے اس کا سبب پوچھا تو آپ نے فرمایا کہ جب خلقت ان کو مجتمع دیکھے گی تو مارے خوف کے سلطان ظلم اور اہل بدعت برائی سے پرہیز کریں گے۔

          وفات آپ کی اس طرح پر وقوع میں آئی کہ آپ اپنے بیٹے ابو احمد نصر کو جو ابھی مراہق تھے، ہمراہ لے کر کافروں کے ساتھ لڑائی کرنے کے لئے روانہ ہوئے۔جب شہر اسپیچاپ سے جو اہل اسلام کی حد تھی،آگے بڑھتے تو کفار نے پکڑ کر آپ کو قتل کردیا۔

(حدائق الحنفیہ)