شیخ ابو المظفر شمس الدین یوسف بغدادی

          یوسف بن فرغلی بن عبداللہ بغدادی: حافظ ابو الفرج ابن جوزی کے نواسہ تھے۔

ولادت:           ۵۸۱؁ھ میں بغداد میں پیدا ہوئے۔

کنیت :           ابو المظفر

لقب:            شمس الدین

بڑے ذکی،عالم فاضل،فقیہ محدث،واعظ فائق اقران اور فارس میدان بحث تھے۔ آپ کی مجلس میں بڑے بڑے علماء و فضلاء و صلحاء اور ملوک و امراء دوزراء شامل ہوتے تھےجس میں نزہت قلوب وابصار حاصل ہوتی تھی اور وعظ میں اس قدر لوگوں کا ہجو ہوتا تھا کہ جس روز آپ کو وعظ کرنا ہوتو تھا اس سے ایک دن پہلے لوگ رات کو مسجد  دمشق میں آکر اپنے بیٹھنے کے لیے جگہ روک لیا کرتے تھے۔اکثر ذمی لوگ بھی آپکے وعظ میں کفر و شرک سے بیزار ہوکر حلقۂ اسلام میں آتے تھے۔ آپ کا باپ وزیر عون الدین بن ہبیرہکا غلام تھا جس نے شیخ جمال الدین ابن جوزی حنبلی کی بیٹی سے نکاح کیا اور اس کے بطن سے آپ پیدا ہوئے ۔

 آپ نے اپنے نانا سے فقہ پڑھی اور حدیث کو سُنا اور حنبلی مذہب پر قائم ہوئے مگر جب موصل و دمشق میں آئے اور جمال الدین محمود حصیری وغیرہ سے تفقہ کیا تو حنفی مذہب اختیار کیا اور دمشق میں کچھ اوپر ۶۰۰؁ھ میں سکونت اختیار کی،تصانیف مفیدہ و عمدہ کیں جن میں سے تفسیر قرآن شریف ۲۹مجلد اور تاریخ مرأۃ الزمان چالیس مجلد اور شرح جامع کبیر اور کتاب ایثار الانصاف اور منتہی السول فی سیرۃ الرسول اور لوامع فی احادیث المختصر اور جامع اور کتاب فی مناقب النعمان مشہور و معروف ہیں۔

          آپ سے آپ کے بیٹے عبد العزیز متوفی ۶۷۰؁ھ نے تفقہ کیا۔

وصال :

آپ کا وصال بروز  منگل کی رات ۲۱؍ماہِ ذی الحجہ ۶۵۴؁ھ میں شہر دمشق میں ہوئی اور آپ کی تدفین جبل قاسیون میں کی گئی۔

(حدائق الحنفیہ)