امام ابو محمد سفیان بن عیینہ

نام :                   سفیان بن عیینہ

کنیت:                 ابومحمد۔

لقب:                 امام الحرام۔

تاریخِ ولادت:

آپ کی ولادت 107ھ کوکوفہ میں ہوئی۔مکۃ المکرمہ میں ہجرت کرکےپہنچےتوان کی عمر تیرہ سال تھی۔

سلسلہ نسب اس طرح ہے:

محدث حرم امام ابو محمد سفیان بن عیینہ  بن ابو عمران میمون ہلالی۔ ابن عیینہ کے دادا ابو میمون عمارہ ضحاک کے بھائی محمد بن مزاحم کے غلام تھے والد عیینہ والیِ کوفہ خالد بن عبداللہ قسری کے عمال میں سے تھے۔ 120ھ میں جب خالد کو معزول کردیا گیا تو عیینہ والیِ  کوفہ یوسف بن عمر ثقفی کے عتاب کاشکار ہوئے گھر بار چھوڑ کر کوفہ سے پورے خاندان کے ساتھ مکہ آگئے اور حرم ہی میں پناہ لی اور وہیں مستقل سکونت اختیار کرلی۔

تحصیلِ علم:

 اس وقت کوفہ علم کا بڑا مرکز تھا جہاں محدثین و فقہاء اور اہل فن علماء کی کمی نہ تھی آپ کے والد صاحبِ علم، صاحب ثروت شخص تھے۔انہوں نے اپنے ہونہار فرزند کی تعلیم و تربیت بڑے اہتمام کے ساتھ کی پہلے قرآن شریف حفظ کرایا گیا سات سال کی عمر میں حفظ سے فارغ ہوئے تو حدیث کی کتابت شروع کرادی گئی 15 سال کی عمر تک یہ سلسلہ جاری رہا ۔پھرہجرت کرکےمکہ میں آئےتو  مکہ مکرمہ اس وقت ائمہ تابعین کا مرکز تھا امام زہری، عمرو بن دینار، ابن جریج اور بہت سے ائمہ قرآن و سنت کی مجلسیں قائم تھیں۔ یہاں آپ باضابطہ تحصیل علم کے لیے آمادہ ہوئے تو تمام علماء مکہ بالخصوص ابن شہاب زہری اور عمرو بن  دینار کی مجلس درس میں شریک ہونے لگے اور جب تک یہاں قیام رہا ان سے الگ نہ ہوئے پھر وہ کوفہ آگئے اور وہاں کے اہل علم سے استفادہ کیا۔ آپ نے ستاسی تابعین کی زیارت کی تھی۔ قدرت نے ابن عیینہ کو بلا کا حافظہ اور ذکاوت عطا فرمائی تھی۔حافظہ اور ذکاوت  کے بارے میں بیان ہے "ماکتبت شیئا حفظتہ" میں جس چیز کو ضبط تحریر میں لایا وہ مجھے یاد ہوگئی۔                                          (تاریخ بغداد، ج۹، ص۱۸۲)

سیرت وخصائص:

امام الحرم،محدث حرم،شیخ المحدثین،رئیس الاتقیاءحضرت امام سفیان بن عیینہ رحمۃ اللہ علیہ۔آپ  کے ذوق و شوق ِعلم، سعادت مندی و ذکاوت کا نتیجہ یہ ہوا کہ وہ علم تفسیر و حدیث کے بڑے امام ہوگئے۔ اکابر ائمہ فن نے ان کی عظمت علم کا اعتراف کیا ہے۔امام شافعی فرماتےہیں:’’لولا مالک و سفیان لذھب علم الحجاز‘‘ امام مالک اور سفیان بن عیینہ نہ ہوتے تو حجاز کا علم ختم ہوجاتا۔                                                             (تہذیب التہذیب، ج۴، ص۱۰۵)

بشر بن مفضل: ’’ما بقی علی وجہ الارض احد یشبہ ابن عیینہ‘‘  روئے زمین پر کوئی عالم ابن عیینہ جیسا باقی نہیں رہا۔ (ایضاً، ص۱۰۶)ابن وہب:"ما رأیت احدا اعلم بکتاب اللہ من ابن عیینہ" میں نے ابن عیینہ سے بڑھ کر کتاب اللہ کا عالم نہیں دیکھا۔ (ایضاً)امام شافعی:"ما رأیت احداً من الناس فیہ جزالۃ العلم مافی ابن عیینہ وما رأیت احدا آلف عن الفتیا منہ"میں نے علم کی جتنی پختگی امام ابن عیینہ میں دیکھی ہے کسی میں نہیں دیکھی اور میں نے ان سے زیادہ فتویٰ دینے سے گریز کرنے والا کوئی عالم نہیں دیکھا۔ (ایضاً)ابن مہدی: "کان اعلم الناس بحدیث اھل احجاز" وہ اہل حجاز کی حدیثوں کے سب سے بڑے عالم تھے۔ (ایضاً، ص۱۰۷)

ابن حبان: ’’کان من الحفاظ المتقین واھل الوراع والدین‘‘ ابن عیینہ متقن حفاظ حدیث میں تھے۔ وہ صاحب تقویٰ اور دیندار تھے۔ (ایضاً)

ابن خلکان: "کان اماما عالما حجۃ زاھداً ورعاً مجمعا علی صحۃ حدیثہ و روایتہ" وہ امام، عالم، ثبت، حجت، زاہد اور پرہیزگار تھے حدیث کی صحت اور روایت میں وہ متفق علیہ ہیں۔                         (وفیات الاعیان، ج۱، ص۳۷۷)

حافظ ذہبی: "العلامۃ الحافظ شیخ الاسلام محدث الحرم۔۔۔ کان امام حجۃ حافظا واسع العلم کبیر القدر" بہت بڑے عالم، نامور حافظ حدیث، شیخ الاسلام اور محدث حرم ہیں۔۔ آپ امام حجت حافظ حدیث، وسیع العلم اور جلیل القدر انسان تھے۔                                                                (تذکرۃ الحفاظ، ج۱، ص۲۴۲)

امام احمد بن حنبل:"ما رأیت اعلم بالسنن منہ" میں نے ان سے زیادہ حدیث کا جاننے والا کوئی نہیں دیکھا۔ (ایضاً)حافظ ذہبی: "اتفقت الائمۃ علی الاحتجاج بابن عیینہ لحفظہ و امانتہ" ابن عیینہ کے حفظ اور امانت میں قابل حجت ہونے پر سب کا اتفاق ہے۔ (ایضاً)

خدمتِ حدیث:

اقوال بالا سے ابن عیینہ کی علمی شخصیت پر روشنی پڑتی ہے، کثرت روایت کے لحاظ سے دوسرے بہت سے تابعین پر فوقیت رکھتے ہیں مگر حدیث میں ابن عیینہ کو جو بات ان کے معاصرین میں ممتاز کرتی ہے وہ حدیث نبوی کا فہم، تفسیر حدیث کا ملکہ اور وثوق واعتماد ہے ان اوصاف میں کم لوگ ان کے ہم پلہ تھے احمد بن عبداللہ فرماتے ہیں: ان کے شمار حکماء حدیث میں ہوتا تھا گوکہ ان کی روایتیں صرف سات ہزار تھیں اور انہوں نے حدیث کا کوئی مجموعہ بھی نہیں چھوڑا۔ (تہذیب الاسماء، ج۱، ص۲۳۴)اکابر حدیث آپ کی فقاہت پر متفق ہیں ابو حاتم کہتے تھے مسلمانوں کے لیے ان (ابن عیینہ) کا علم حجت ہے عجلی کا بیان ہے کہ ان کی ذات قابل و ثوق اور قابل اعتماد ہے۔   (تہذیب الاسماء، ج۴، ص۱۳)

جب حضرت سفیان ابن عیینہ کوفہ پہنچےتو امام اعظم ابو حنیفہ رضی اللہ تعالی عنہ نے اپنے اصحاب سے فرمایا :"جاء کم حافظ علم عمرو بن دینار" تمہارے پاس عمرو بن دینار کی مرویات کا حافظ آگیا ہے۔ چناں چہ لوگ ان کی مرویات سے استفادہ کے لیے آنے لگے ابن عیینہ کا بیان ہے "اول من صیرنی محدثا ابو حنیفۃ" جس نے مجھے سب سے پہلے محدث بنایا وہ امام ابو حنیفہ ہیں۔                                                              (وفیات الاعیان، ج۱، ص۳۷۷)

ابن عیینہ کا حلقۂ درس بہت وسیع تھا مگر ایام حج میں جب عالم اسلام کے لوگ حرمین شریفین حاضر ہوتے تو ان کے حلقۂ درس میں ازدحام ہوتا تھا۔حضرت امام شافعی،امام عبدالرزاق،امام اعمش،امام وکیع،سفیان ثوری،حمادبن زید،یحیٰ بن قطان وغیرہ آپ کےتلامذہ میں سےہیں۔

ابن عیینہ کی جلالت شان کے معترف صرف عوام اور علماء ہی نہ تھے بلکہ خلفاء اور امراء بھی آپ کا حد درجہ احترام کرتے تھے اور ان کا نام عزت کے ساتھ لیتے تھے ابو ربیع کہتے ہیں میں ایک بار ہارون رشید سے ملا تو اس نے پہلے ہاشمی عالموں کا حال پوچھا پھر کہنے لگا سید الناس کا کیا حال ہے؟ میں نے کہا امیر المومنین آپ کے سوا سید الناس کون ہے؟ کہا سفیان بن عیینہ سید الناس ہیں۔جب علماءومحدثین کی بادشاہ وامراءقدرکرتےتھے،تواس وقت مسلمانوں کوعروج حاصل تھا۔کفاران کی ہیبت سےکانپتےتھے،لیکن جب اس امت نےاپنےعلماءِ کرام کی قدرکرناچھوڑدی توذلت ورسوائی اس کامقدربن گئی۔آج پوری دنیامیں مسلمانوں کی جوحالت ہےوہ کسی سےپوشیدہ نہیں ہے)۔ (تاریخ بغداد، ج۹، ص۱۷۰)

اساتذہ :

عبدالملک بن عمیر، ابو اسحاق سبیعی، زیاد بن علاقہ، اسود بن قیس، ابان بن تغلب، ابراہیم موسیٰ، محمد، اسحاق بن عبداللہ بن ابی طلحہ، اسرائیل ابو موسیٰ، اسماعیل بن ابی خالد، اسماعیل بن امیہ، ایوب بن موسیٰ، ایوب بن ابی تمیمہ سختیانی، یزید بن ابی بردہ، بیان بن بشر، جعفر صادق، جامع بن ابی راشد، حمید الطویل، حمید بن قیس اعرج، زکریا بن ابی زائدہ، زید بن اسلم، سالم ابو النضر، ابو حازم بن دینار، سلیمان تیمی، سلیمان احول، سمی، سہیل، شبیب بن غرقدہ، صالح بن کیسان، صالح بن حی، صفوان بن سلیم، ضمرہ بن سعید، عاصم احول، عاصم بن بہدلہ بن کلیب، عبداللہ بن دینار، ابوالزناد، عبداللہ بن طاؤس عبداللہ بن ابی حسین، ابن ابی نجیح، عبدریہ، سعد، یحییٰ، عبدالرحمن بن قاسم، عبدالعزیز بن رفیع، عبدالکریم ابو امیہ، عبدالکریم جزری، عبیداللہ بن عمر، عبیداللہ بن ابی یزید، علی بن زید بن جدعان، عبید اللہ بن عبداللہ بن اصم، عمرو بن دینار، امام زہری، علاء بن عبدالرحمن، ابن عجلان، محمد بن عمرو بن علقمہ، مطرف بن ظریف، اعمش، منصور، ولید بن کثیر، یزید بن خصیفہ، ابواسحاق شیبانی، ابو یعفورالکبیر، ابو یعفور الصغیر۔                                    (تہذیب التہذیب ج ۴ ص ۵، ۱۰۴)

علم وفضل:

سفیان بن عیینہ کے ذوق وشوقِ علم، سعادت مندی و ذکاوٹ کا نتیجہ یہ ہوا کہ وہ علمِ تفسیر وحدیث کے بڑے امام ہو گئے۔اکابر ائمہ فن نے ان کی عظمتِ علم کا اعتراف کیا ہے۔

امام شافعی: "لولا مالک وسفیان لذهب علم الحجاز" امام مالک اور سفیان بن عیینہ نہ ہوتے تو حجاز کا علم ختم ہو جاتا۔

(تہذیب التہذیب ج ۴ ص ۱۰۵)

عجلی: "کوفی ثقة ثبت فی الحدیث وكان حسن الحدیث يعد من حكماء اصحاب الحديث" وہ کوفہ کے رہنے والے ثقہ حدیث میں پختہ کار ہیں وہ عمدہ حدیثوں والے تھے اور وہ دانشور محدثین میں شمار کیے جاتے تھے۔ (ایضاً)

بشر بن مفضل: "ما بقى على وجه الارض احد يشبه ابن عيينة" روئے زمین پر کوئی عالم ابنِ عیینہ جیسا باقی نہیں رہا۔ (ایضاً ص ۱۰۶)

ابن وہب: "ما رايت احدا اعلم بكتاب الله من ابن عيينة" میں نے ابنِ عیینہ سے بڑھ کر کتاب اللہ کا عالم نہیں دیکھا۔ (ایضاً)

امام شافعی: "ما رايت احداً من الناس فيه جزالة العلم ما في ابن عيينة و ما رايت احدا آلف عن الفتيا منه" میں نے علم کی جتنی پختگی امام ابنِ عیینہ میں دیکھی ہے کسی میں نہیں دیکھی اور میں نے ان سے زیادہ فتویٰ دینے سے گریز کرنے والا کوئی عالم نہیں دیکھا۔ (ایضاً)

ابن مہدی: "کان اعلم الناس بحديث اهل الحجاز" وہ اہل حجاز کی حدیثوں کے سب سے بڑے عالم تھے۔ (ایضاً ص ۱۰۷)

ابو حاتم رازی: "ثقة امام واثبت اصحاب الزهرى مالک وابن عيينة" وہ ثقہ امام ہیں اور ابنِ شہاب زہری کے شاگردوں میں اثبت مالک اور ابن عیینہ ہیں۔ (ایضاً)

ابن خراش: "ثقة مامون ثبت" ثقہ، مامون اور ثبت ہیں۔ (ایضاً)

امام بخاری: "هو احفظ من حماد بن زيد" ابن عیینہ حماد بن زید سے بڑے حافظ تھے۔ (ایضاً)

حدیث اور درسِ حدیث:

اقوالِ بالا سے ابنِ عیینہ کی علمی شخصیت پر روشنی پڑتی ہے، کثرتِ روایت کے لحاظ سے دوسرے بہت سے اتباع تابعین آپ پر فوقیت رکھتے ہیں مگر حدیث میں ابنِ عیینہ کو جو بات ان کے معاصرین میں ممتاز کرتی ہے وہ حدیثِ نبوی کا فہم، تفسیرِ حدیث کا ملکہ اور وثوق و اعتماد ہے ان اوصاف میں کم لوگ ان کے ہم پلہ تھے احمد بن عبداللہ فرماتے ہیں۔ ان کا شمار حکماءِ حدیث میں ہوتا تھا گو کہ ان کی روایتیں صرف سات ہزار تھیں اور انہوں نے حدیث کا کوئی مجموعہ بھی نہیں چھوڑا۔            (تہذیب الاسماء ج ۱ ص ۲٣٤)

عبدالعزیز بن ابی داؤد کہتے ہیں کہ سفیان ثوری کی مجلس سے مسند روایتیں سن کر ابنِ عیینہ کے پاس جاتا اور ان روایتوں کو ان کے سامنے پیش کرتا وہ کہتے اس میں یہ غلطی ہے اور اس میں یہ اضافہ ہے پھر میں سفیان ثوری کے پاس آتا اور ان سے ابنِ عیینہ کی تنقید کا ذکر کرتا تو فرماتے ابنِ عیینہ نے جو کہا ہے وہ صحیح ہے۔              (تاریخ بغداد ج ۹ ص ۱۸۱)

عبدالرحمن بن مہدی نے فرمایا: ابنِ عیینہ کو حدیث کی تفسیر اور حدیث کے متفرق الفاظ کے جمع کرنے میں مہارت حاصل تھی۔ (ایضاً ص ۱۸۱)

تلامذہ :

اعمش، شعبہ، ابن جریج، ثوری، مسعر، ابو اسحاق فزاری، حماد بن زید، حسن بن حی، ہمام، ابو الاحوص، ابن مبارک، قیس بن ربیع، ابو معاویہ، وکیع، معتمر بن سلیمان، یحییٰ بن ابی زائدہ، محمد بن ادریس شافعی، عبداللہ بن وہب، یحییٰ قطان، ابن مہدی، ابو اسامہ، روح بن عبادہ فریابی، ابو الولید طیالسی، عبدالرزاق، ابو نعیم، ابو غسان نہدی، احمد بن حنبل، یحییٰ بن معین، علی بن مدینی، اسحاق بن راہویہ، عمرو بن علی فلاس، ابو خیثمہ، احمد بن صالح مصری، احمد بن منیع، ابو توبہ حلبی، ابو جعفر نفیلی، ابوبکر حمیدی، ابن عمر مدنی، علی بن حجر، علی بن خشرم، قتیبہ، ابو موسیٰ عنزی، احمد بن شیبان رملی، حسن بن محمد زعفرانی، زبیر بن بکار، محمد بن عیسیٰ بن حبان، محمد بن عاصم اصبہانی۔                                         (تہذیب ج ۴ ص ۱۰۵)

فقہ و تفسیر:

امام ابنِ عیینہ کو حدیث کے ساتھ فقہ اور تفسیر میں بھی ملکہ حاصل تھا احمد بن حنبل فرماتے ہیں "ما رأيت احدا من الفقهاء اعلم بالقرآن والسنن منه" میں نے فقہاء میں سے کسی شخص کو ابنِ عیینہ سے زیادہ قرآن و سنت کا عالم نہیں دیکھا۔                                                                                                 (تہذیب ج ۴ ص ۱۰۵)

امام شافعی نے فرمایا: "وجدت احاديث الاحكام كلها عند مالك سوى ثلاثين حديثا ووجدتها كلها عند ابن عيينة سوى ستة احاديث" مجھے امام مالک کے پاس ۳۰/ کے سوا احکام کی تمام احادیث مل گئیں اور امام ابنِ عیینہ کے پاس ۶/ کے سوا احکام کی تمام احادیث موجود تھیں۔                                        (تذکرہ ج ۱ ص ۲۴۲)

تفسیر میں اتباع تابعین کی جماعت میں نمایاں مقام رکھتے تھے امام احمد بن حنبل فرماتے ہیں اھلِ علم میں ان سے زیادہ قرآن کا جاننے والا عالم نہیں دیکھا۔                                                          (تہذیب الاسماء ج ۱ ص ۲۲)

ابن عیینہ کی جلالتِ شان کے معترف صرف عوام اور علماء ہی نہ تھے بلکہ خلفاء اور امراء بھی آپ کا حد درجہ احترام کرتے تھے اور ان کا نام عزت کے ساتھ لیتے تھے ابوریح کہتے ہیں میں ایک بار ہارون رشید سے ملا تو اس نے پہلے ہاشمی عالموں کا حال پوچھا پھر کہنے لگا سید الناس کا کیا حال ہے؟ میں نے کہا امیر المؤمنین آپ کے سوا سید الناس کون ہے؟ کہا سفیان بن عیینہ سید الناس ہیں۔                                                                                                (تاریخ بغداد ج ۹ ص ۱۷۹)

جس کی عقل زیادہ ہوتی ہے اس کا رزق کم ہوتا ہے۔           زہد دراصل صبر ہے اور موت کے انتظار کا نام ہے۔

علم نفع نہ دے تو ضرر پہنچائے گا۔         جب کوئی عالم لاادری کہنا چھوڑ دیتا ہے تو وہ اپنی ہلاکت کا سامان کرتا ہے۔           (تذکرہ ج ۱ ص ۲۱۲)     (صفوۃ الصفوۃ ج ۲ ص ۱۳۱)

زہد وعبادت:

ابن عیینہ کا پایہ جس قدر علم میں بلند تھا اسی قدر زہد وعبادت میں اپنے معاصرین پر فائق تھے۔ زندگی بڑی سادہ اور بے تکلف گزارتے تھے ۔ ایک بار ان کے شاگرد ابو یوسف غسولی ابن عیینہ سے ملنے گئے تو دیکھا کہ ان کے پاس جو کی دو ٹکیاں رکھی ہوئی ہیں۔ فرمایا چالیس سال سے یہی میری غذا ہے۔

علی بن مدینی فرمایا کرتے تھے "ما فی اصحاب الزهرى اتقى من ابن عيينة" زہری کے شاگردوں میں ابن عیینہ سے بڑا متقی کوئی نہیں۔                                                                                                                                 (تہذیب ج ۴ ص ۱۰۵)

عبادت و ریاضت سے بڑا شغف تھا انہوں نے ستر بار حج و زیارت کی سعادت حاصل کی جب عمر کے آخری سال حج کیا تو فرمایا "قد وافیت هذا الموضع سبعین مرة" میں اس مقدس مقام میں ستر بار آیا۔            (وفیات الاعیان ج ۱ ص ۲۷۷)

تاریخِ وصال:

آپ کاوصال یکم رجب المرجب /198ھ،مطابق 24/فروری 815ءکوہوا۔

مدفن:

کوہِ حجون کےقریب مکۃ المکرمہ میں مدفون ہوئے۔

 

ماخذ مراجع، محدثین عظام حیات و خدمات