حضرت مولانا قاضی عبدالمجید صاحب، بیلہ (بلوچستان) علیہ الرحمۃ 

حضرت علامہ مولانا قاضی عبدالمجید صاحب ابن قاضی محمد اسماعیل صاحب (مرحوم) بیلہ ضلع لسبیلہ بلوچستان کے ایک علمی گھرانے میں ۱۳۶۵ھ/ ۱۹۴۵ء میں پیدا ہوئے۔ آپ کا نسبی تعلق قریشی خاندان سے ہے۔ آباؤ اجداد علومِ اسلامیہ کے مبلغ و مدرس رہے۔ آپ کے جد اعلیٰ امیر قاضی محمد اسماعیل (مرحوم) نے مدرسہ حبیبہ کے نام سے ایک دینی درس گاہ کی بنیاد رکھی۔ اُن کے وصال پر آپ کے جدِّ امجد قاضی حبیب اللہ صاحب جو بیلہ کے قاضی بھی تھے، نے اس مدرسہ کو آباد کیا۔ پھر آپ کے والد جناب قاضی محمد اسماعیل صاحب مرحوم نے اس  ادارہ میں علومِ عربیہ کا فیضان جاری کیا اور آج کل حضرت مولانا قاضی عبدالمجید صاحب اس دارالعلوم کے مہتمم و مدرس ہیں۔

آپ نے تمام علومِ متداولہ کی تعلیم اپنے آبائی دارالعلوم حبیبہ بیلہ ضلع لسبیلہ میں حضرت مولانا محمد سلیمان صاحب اور اپنے والد حضرت علامہ قاضی محمد اسماعیل سے حاصل کرنے کے بعد اسی مدر سہ سے ۱۳۸۷ھ/ ۱۹۶۷ء میں سندِ فراغت و دستارِ فضیلت حاصل کی۔

فراغت کے بعد سے اب تک مدرسہ حبیبہ بیلہ میں  تدریسی خدمات انجام دے رہے ہیں اور اس سے ملحقہ مسجد میں فرائضِ خطابت سر انجام دیتے ہیں۔

آپ کا روحانی تعلق اپنے والد و استاذِ مکرم حضرت مولانا قاضی محمد اسماعیل صاحب سے ہے۔

آپ کے چند مشہور تلامذہ یہ ہیں:

۱۔       مولانا محمد صدیق     ۲۔       مولانا محمد صالح

۳۔      مولانا محمد عیسیٰ       ۴۔      مولانا محمد قاسم

۵۔       مولانا نور محمد وغیرہم

آپ کا ایک صاحبزادہ جناب محمد اسحاق صاحب ہیں۔

[۱۔ مکتوب مولانا قاضی عبدالمجید بنامِ مرتب کے ذریعے کوائف معلوم ہوئے، مرتب حضرت مولانا کا ممنون ہے۔]