حضرت قاضی عبدالکریم بن قاضی نعمت اللہ ڈاہری گوٹھ ’’سن ‘‘تحصیل دولت پور ضلع نوابشاہ میں تیرہویں صدی میں تولد ہوئے ۔ قاضی عبدالکریم کی والدہ ماجدہ کا اسم گرامی ’’مریم ‘‘ تھا ۔ وہ ثانی غزالی عارف کامل حضرت مخدوم ابوالحسن ڈاہری قدس سرہ الاقد س کی پوتی تھیں ۔ اور مخدوم صاحب کے بیٹے میاں عبدالرسول ڈاہری کی صاحبزادی تھیں ۔ ایک طرف قاضی عبدالکریم ، مخدوم ابوالحسن کی پوتی کے بیٹے ہیں تو دوسری جانب سے مخدوم ابوالحسن کے چچا میاں مہر علی ڈاہری کی اولاد میں سے ہیں ۔قاضی عبدالکریم لاولد تھے فقط ایک بھائی تھے جس کا نام حکیم قاضی عبدالغنی ڈاہری (وفات ۹، ذوالحجہ ۱۳۲۰ھ؍۱۹۰۳ئ) ہے ۔ قاضی عبدالغنی اپنے وقت کے نہایت نامور حکیم ہو گذرے ہیں ۔

مولانا قاضی عبدالکریم ڈاہری نے تعلیم و تربیت مورو شہر کے ’’قاضی خاندان ‘‘ کے نامور عالم دین ، وقت کے بے مثال فقیہ حضرت علامہ قاضی عبدالروٗف ؒ سے حاصل کی ۔

اس سے زیادہ معلومات دستیاب نہ ہوئیں اور آپ کے مزار کی نشاندہی بھی نہیں ہو سکی ، ولادت و وصال کے سن کا بھی صحیح پتہ نہیں چل سکا ۔ (ڈاکٹر غلام محمد ڈاہری : میگزین مہران کالج مورو ، مطبوعہ ۲۰۰۰ئ)

قاضی عبدالکریم اپنے وقت کے نامور عالم دین ، مدرس اور مفتی تھے ، زندگی دین کی تبلیغ و اشاعت میں بسر فرمائی۔ زمانہ کی ستم ظریفی اور اپنوں کی بے قدری کے سبب ان کے حالات محفوظ نہ ہو سکے ۔

(انوارِ علماءِ اہلسنت سندھ)