حضرت شیخ نصیر الدین بن حضرت گنج شکر 

حضرت خواجہ گنجشکر قدس سرہٗ کے بڑے بیٹے کا اسم گرامی شیخ نصیر الدین تھا جو صاحب اوصاف حمیدہ اور اخلاق مرضیہ سےمتصف تھے آپ زراعت کا کام کر کے لقمۂ حال مہیا کرتے تھے۔ آ پ نے ساری عمر رضائے حق میں بسر فرمائی۔ مراۃ الاسرار میں لکھا ہے کہ شیخ نصیر الدین کے چھ بیٹے تھے۔ صاحب مراۃ الاسرار  نے یہ بھی لکھا ہے کہ بعض لوگوں کو خیال ہے کہ خواجہ نصیر الدین حضرت خواجہ گنجشکرکے متنبہ تھے۔ اور بعض کہتے ہیں کہ آپ حضرت اقدس خادمہ شارو کے بیٹھے تھے۔ بعض کا خیال ہےکہ حضرت خواجہ گنجشکر نے ایک بیوہ عورت سے شادی کی تھی جنکا نام ام کلثوم تھا اور شیخ نصیر الدین ان کے ہمراہ آئے تھے۔ اور انکی حضرت نے اپنے بیٹے کی طرح تربیت فرمائی اور محبت سے پیش آتے تھے۔ واللہ اعلم ۔ انکا مزار قصبہ جاولیانہ میں ہے جو پرگنہ قبولہ میں واقع ہے قبولہ انکا اصل وطن تھا۔ حضرت خواجہ گنجشکر کے والد ماجد اور بڑے بھائی شیخ اعزالدین محمود کے مزار بھی اُسی جگہ ہیں۔

(اقتباس الانوار)