بن عامر از بنو نمیر: ان کی کنیت ابن سحیم تھی ان کے والد کو حضور اکرم صلی اللہ علیہ وسلم کی صحبت نصیب ہوئی یہ ابن مندہ کا قول ہے اور انہوں نے با سنادہ وہب سے انہوں نے ایوب سے انہوں نے ابو قلابہ سے انہوں نے قبیصہ سے روایت کی اور ان کے سوا باقی لوگوں نے ہلال بن عامر سے روایت کی کہ حضور اکرم صلی اللہ علیہ وسلم کے زمانے میں ایک دفعہ سورج کو گرہن لگا اور حدیث بیان کی اور ایک دوسرے اسناد سے جریر بن حازم سے روایت کی کہ ایک آدمی مجلس ایوب میں بیٹھا ہوا تھا کہ مجھ سے قرہ بن دعموص نمیری نے بیان کیا کہ رسولِ اکرم صلی اللہ علیہ وسلم نے ضحاک بن قیس کو صدقات جمع کرنے کو روانہ کیا جب وہ واپس آئے تو حضور صلی اللہ علیہ وسلم نے فرمایا تم نمیر بن عامر، ہلال بن عامر اور عامر اور عامر بن ربیعہ کے ہاں گئے ہو اور ان کے بہترین جانور ہانک لائے ہو انہوں نے عرض کیا یا رسول اللہ! میں نے آپ کو جہاد کا ذکر کرتے سنا۔ اس لیے میں نے مناسب جانا کہ بہترین جانور لے کر جاؤں تاکہ ان سے سواری اور باربرداری کا کام لیا جاسکے حضور اکرم صلی اللہ علیہ وسلم نے فرمایا، واپس جاؤ، اور ان کے اعلیٰ جانور واپس کرکے معمولی درجے کے جانور لے آؤ۔