عظمت ِ عقلی انسانی

اے خرد! صبحِ ادب فخرِ سخن، نازِ قلم
غازۂ چہرۂ قرطاس و نگارِ عالم
فخرِ اسکندر و دارا و کے و خسرو وجم
ناقد و نکتہ ور و مدرک ِ اسرار ِ قِدَم
شوق کو رنگ دیا، ذوق نکھارا تُو نے
گیسوئے لیلیِ فطرت کو سنورا تُو نے
تیرے دم سے ہے گلستانِ تخیّل میں بہار
تیرے جلوے سے ہوئے دشت و بیاباں گلزار
تجھ سے ہے زمزمہ و نغمہ و گلبانگِ ہزار
تُو  نہ ہو جلوہ فروزاں تو ہے انساں بے کار
کون ایسا ہے کہ جس پر ترا احسان نہیں
تجھ سے پھر جائے جو انسان وہ انسان نہیں
علمِ دیں علم ِ یقیں، علمِ فلک علمِ کتاب
موجِ گُل، موجِ صبا، موجِ طرب، موجِ شراب
ذوقِ دل، ذوق ِ نظر، ذوقِ طلب، ذوقِ شباب
حسنِ ظن، حسنِ گماں حسن ِ بیاں حسنِ خطاب
اِن کے اسرار بتائے تو بتائے تُو نے
یہ حجابات اٹھائے تو اٹھائے تُو نے
تیرا ظاہر ترے باطن کی طرح ہے بے داغ
جستجو سے تری ملتا ہے حقیقت کا سراغ
تو جلاتی ہے جہالت کے اندھیروں میں چراغ
تیرا ممنونِ عنایت ہے انساں کا دماغ
رازِ سر بستہ بہ صد ناز وادا کھول دیئے
تُو نے انسان پہ دَربائے بقا کھول دیئے
بزمِ غم، بزمِ طرب، بزمِ فنا، بزمِ بقا
رنگِ گُل ، رنگِ چمن ، رنگِ وفا، رنگِ جفا
صدقِ دل، صدقِ طلب، صدقِ نظر، صدقِ دعا
تیرے ہی دم سے اِن الفاظ کو مفہوم ملا
حضرتِ حق میں بہ جز تیرے نیازیں بے سُود
تُو نہ یاور ہو تو واعظ کی نمازیں بے سُود
شاعر و فلسفی و شاہ حکیم و قاضی
حافظ و محتسب و میر و خطیب و قاری
مطرب و ساقی و سلطان و گدا صوفی
مفتی و حاکم واستاذ و ادیب و ہادی
سب ترے لطف و عنایات سے فرزانے ہیں
تُو اگر اِن سے بچھڑجائے، یہ دیوانے ہیں
یہ ترنّم، یہ تکلّم، یہ تبسّم، یہ سُرور
یہ تجسّس، یہ تفحّص، یہ تفکّر، یہ شعور
یہ فلک بوس عمارات، یہ ایواں، یہ قُصور
یہ فصاحت، یہ بلاغت، یہ قوانی، یہ بُحور
بابِ ادراک ہر انسان پہ وا کرتی ہے
قلب کو دولت ِ احساس عطا کرتی ہے
جھولیاں گوہرِ اسرار سے بھر دیتی ہے
ذہن کو راستہ، دیوار کو در دیتی ہے
طائرِ فکر کو الفاظ کے پر دیتی ہے
تو غنی بندۂ محتاج کو کر دیتی ہے
تُو تفکّر ہے، تدبّر ہے، ذہانت تُو ہے
ہم کو خالق سے ملی ہے جو امانت، تُو ہے
تُو زماں اور مکاں، گردشِ دوراں تُو ہے
دیدۂ  مہرِ ضیا بار میں رخشاں تُو ہے
زیورِ نازِ بہتاں، زینتِ خوباں تُو ہے
جامِ لبریز میں رقصندہ و رقصاں تُو ہے
چرخ درباں ہے ترے در پہ زمیں جھکتی ہے
تیری سرکار میں شاہوں کی جبیں جھکتی ہے
تجھ سے ہی اہلِ تدبّر کی فراست کا بھرم
تیرے ہی دم سے ہے دارائیِ اربابِ قلم
صفحۂ دہر پہ ہیں تیری عنایات رقم
عالمِ غیب کا جُنباں ہے ترے سر پہ علم
بات بنتی ہے ترے فیض سے انسانوں کی
سانس رکتی ہے تیرے نام سے طوفانوں کی
تجھ  سے ملتی ہے اساطیر سے انساں کو نجات
تُو عطا کرتی ہے گنجینۂ اسرار و نکات
پردۂ غیب تو  ہے اک ترے خیمے کی قناعت
تجھ سے کھلتا ہے درِ بار گہِ ذات و صفات
کوئی مشکل ہو تُو آسان بنا دیتی ہے
حد یہ ہے ، کفر کو ایمان بنا دیتی ہے
غاؔلب و موؔمن و فردوؔدسی و مؔیر و سعدؔی
حاؔفظ و روؔمی و عطؔار و جنید^﷫ و شبلی^﷫
خسؔرو و جاؔمی  وخیؔاّم و انؔیس و عرؔفی
آدم و  یونس و یحییٰ و نبی اور ولی
اِن کی گفتار کی پرواز کی سرحد تُو ہے
غایت ِ جنبش ِ لب ہائے محمد^ﷺ تُو ہے
تُو یقیں اصل و ذکا محور و ادراک اساس
حافظِ مصحفِ حق، سنّت و اجماع وقیاس
نکتہ داں، نکتہ ور و نکتہ رس و نکتہ شناس
تجھ سے انسان کو ہے شادی و غم کا احساس
ملکِ انصاف و صداقت میں ہے شاہی تیری
ہر عدالت میں ہے مقبول گواہی تیری
سردی و گرمی و شیرینی وتلخیّ و عسل
گلشن و وادی و صحرا وتل و دشت وجبل
تُو ہے تہذیب و تمدّن میں ترقّی کا عمل
مشتری، زُہرہ و ناہید و ثریّا وزُحَل
اُٹھ گیا پردۂ تاریکِ شب آسا تجھ سے
ذہنِ انساں پہ ہوا نور کا تڑکا تجھ سے
ہیں ترے تابعِ فرماں حرکات و سکنات
تیرے ہی دم سے شعور ِ حسنات وبرکات
تجھ سے مضبوط اساسِ در و دیوار ِ حیات
منحصر تیری بلندی پہ عروج ِ درجات
تیر قوّت کی ادا اہلِ نظر جان گئے
تیرا لوہا مَلک و ارض و سما مان گئے
ہے عباراتِ پریشان کی تجھی سے تطبیق
تیری عفّت سے مزیّن ہے کلامِ صدیق^﷜
تجھ سے بے بہرہ اگر ہو تو ہے انساں زندیق
قصرِ اخلاق ہے تُو اور بِنائے تخلیق
تجھ سے ساغر مئے افکار کے ہم بھرتے ہیں
عرش والے ترے اجلال کا دم بھرتے ہیں
تیری تحریک کے محتاج ہیں عرفان و شعور
تیرے پردوں میں ہے سازِ طربِ جم مستُور
تیری شادابیِ افکار سے انساں مسرور
تیری ٹھوکر میں ہے جامِ جم و تاجِ فغفُور
کس کی آہٹ تھی، جو یہ دشت و جَبل کانپ گئے
کس کی تکبیر تھی، کیوں لات و ہُبَل کانپ گئے
دشنہ و ناوک وتیر و تبر تیغ و قلم
نیزہ خنجر  وگُرز و طبل و جاہ و حشم
منجیق و زِرہ و جوشن و شمشیر و علَم
ترکش و خود و خدنگ و سپر و ماتم و غم
اِن سے تُو نے صفِ پیکار میں جب کام لیا
ضرب وہ آئی کہ دشمن نے جگر تھام لیا
برق نے پائی ہے تھوڑی سی روانی تیری
قُمریوں میں روشِ زمزمہ خوانی تیری
معتبر تا بہ فلک سِحر بیانی تیری
ہم تو کیا، بات فرشتوں نے بھی مانی تیری
ساری دنیا میں جہالت کا بسیرا ہو جائے
تُو جو اُٹھ جائے تو عالم میں اندھیرا ہو جائے
نُور ِ مہتاب ہے، دریا کی روانی تُو ہے
شوق کا حُسن  ہے، جذبوں کی جوانی تُو ہے
عزّت و عظمتِ انساں کی نشانی تُو ہے
سچ ہے، تعمیر و ترقّی کی کہانی تُو ہے
عقل پلّے ہو، یہی ایک  ہے  بس کام کی بات
یہی ایماں کا خلاصہ ، یہی اسلام کی بات
(عرش ناز)