اہلبیت احمد مختار کی کیا شان ہے
ان کی ذات پاک گویاکشتی طوفان ہے

دامن آل نبی ﷺ دست یقین میں جس کے ہے
ساحل مقصود اس کے واسطے آسان ہے

اقتدار و اتباع آل رسول اللہ ﷺ کا
مومنوں کی مغفرت کا کیا بڑا سامان ہے

جو محب اہل بیت سیّد کونین ہے
واسطے اس کے بہار روضۂ رضوان ہے

عفت و عظمت طہارت پارسائی اتقا
شاں میں ان کے تمامی لائق و شایان ہے

کیوں نہ ہو اس کو اماں خورشید محشر سے بھلا
جس کے سر پر حب اہل بیت کا داماں ہے

آیت تطہیر جن کےواسطے نازل ہوئے
وہ جناب مصطفی کی آل والا شان ہے

ہم کو اے کاؔفی محبت عترت اطہار کی
دین ہے اسلام ہے ایمان ہے عرفان ہے
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)