احسان و کرم ہم پہ وہ کیا کیا نہیں کرتا
وہ کون سی رحمت ہے کہ مولا نہیں کرتا

اُس گُلشنِ امکاں میں نہیں برگ کو جنبش
جب تک کہ ہوا کو وہ اشارا نہیں کرتا

تدبیرِ عقیلانِ جہاں فعلِ عبث ہے
کوئی خطِ تقدیر مٹایا نہیں کرتا

بے تیری عنایات کے، او معطیِ مطلق!
مطلب کو مِرے کوئی بھی پورا نہیں کرتا

وہ کون سی مشکل ہے، مِرے خالقِ اکبر!
آسان جسے لطف تمھارا نہیں کرتا

پھر پنجۂ قدرت سے مِرے کھول دے، یا رب !
یہ عقدۂ مشکل جو کوئی وا نہیں کرتا

جُز مرحمت و بخشش و غفراں کوئی مرہم
زخمِ دلِ صد چاک کو اچھا نہیں کرتا

یا رب! تِری درگاہ میں جُز رحمتِ عالَم
میں اور کسی کا تو وسیلہ نہیں کرتا

اُس صاحبِ لَوْ لَاک رسولِ عربیﷺ کی
خاطر، مِرے اللہ! تو کیا کیا نہیں کرتا

اِس اُمّت ِ عاصی کو مَعاصی کے سبب سے
اللہ رے ستار کہ رُسوا نہیں کرتا

مقبولِ شفاعت وہ نبیﷺ صاحبِ کوثر
کچھ ہم سے دریغ اپنی دعا کا نہیں کرتا

یہاں اور وہاں اُمّتِ عاصی کی رہائی
وہ کون سا ہے روز کہ چاہا نہیں کرتا

اپنا یہ عقیدہ ہے کہ حضرت کی دعا میں
وقفہ میرے اللہ تو اصلا نہیں کرتا

دے بہر دعائے نبوی ﷺ مطلبِ کافؔی
جُز عشقِ نبی ﷺ اور تمنّا نہیں کرتا
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)