السّلام اے نسبتِ تو تاجِ عشق

السّلام اے دید ِ تو معراجِ عشق

السّلام اے صادق ُ الوعُد الامیں

السّلام اے رحمۃ ً للعالمین

السّلام اے پیکر ِ جودو سخا

السّلام اے قاسم ِ ملک ِ خدا

السّلام اے شافعِ روز حساب

السّلام اے حاصلِ اُمُّ الکتاب

السّلام اے صاحب خُلق ِ عظیم

السّلام اے صاحب ِ لطفِ عمیم

السّلام اے واقفِ اسرار کل

السّلام اے مالک و مختار ِ کل

گر گئے ہیں ہم کرم فرمائیے

دُور سارے درد وغم فر مائیے

ہر قدم پر اک نئی افتاد ہے

المدد فریاد رس فریاد ہے

آپ ہی ہیں بے امانوں کی اماں

آپ کا در چھوڑ کر جائیں کہاں

اپنے دامن میں چُھپالیں یا نبی

نارِ دوزخ سے بچالیں یا نبی

جاں کنی کے وقت ہوں گی سختیاں

لے نہ ڈوبیں ہم کو تیرہ سختیاں

موت جب آئے تو آجانا حضور

اپنی صُورت ہم کو دکھلانا حضور

قبر کا بھی مرحلہ ہے ہولناک

خاک میں جس وقت یہ پہنچے گی خاک

آئیں گے پُرسش کو جب منکر نکیر

کیا کہیں گے ہم عملی میں ہیں فقیر

ہوں گے عاجز ہم جواب ِقبر سے

تم بچا لینا عذاب قبر سے

جب سوا نیزے پہ ہوگا آفتاب

کررہے ہوں گے جہاں سب آب آب

اپنے دامن میں چھپا لینا ہمیں

جامِ کوثر کا پلا دینا ہمیں

جب تلیں اعمال بد میزان پر

جب ندامت سے جھکے جاتے ہوں سر

آپ آجائیں شفاعت کے لئے

آپ ہی رحمت ہیں امت کے لئے

آپ ہی کی دو جہاں میں آس ہے

اور ورنہ کیا ہمارے پاس ہے

السّلام اے آبروئے دو جہاں

السّلام اے پردہ دارِ عاصیاں

السّلام اے بے کسوں کے دادرس

السّلام اے دہر کے فریاد رَس