چشمک یہ کر رہی ہے عبث تیز بجلیاں
لو پھونک دے رہا ہوں میں خود اپنا آشیاں
آخر کو رنگ لا کے رہا خونِ بلبلاں
اڑ کر رہی گلوں کے گریباں کی دھجیاں
پہلوئے دل نہ ہوسکا ویران و بے نشاں
پژمردہ دل پہ ٹوٹ پڑیں بے قراریاں
ابھرا ہوں خاک ہو کے حنا کے لباس میں
اللہ رے یہ شوق قدمبوسئ بتاں
رنگینیٔ عذار بتاں سے نہ کھا فریب
نادان یہ ہیں خون غریباں کی سرخیاں
یہ سوچ کرنگاہ جھکائے ہوئے تھا میں
شرمندہ ہونہ جائیں کہیں لن ترانیاں
اللہ رے فریب یہ حسن خیال کا
سمجھے ہوئے تھا تنگئ زنداں کو گلستاں
سن اے غم فراق ترا شکر یہ ہزار
دامن بنا ہوا ہے مرا رشک کہکشاں
کیا ہے اسی کرم پہ تجھے ناز باغباں
کچھ کم نہیں قفس سے مرے حق میں آشیاں
فریاد دل کرے نہ گر اخؔتر تو کیا عجب
اٹھتا کہیں ہے آگ کے شعلوں سے بھی دھواں؟