دَہر کی مشکلوں کو ٹالا ہے

پستیوں سے ہمیں نکالا ہے

صرف میں کیا ہوں ساری دنیا کو

رحمت ِ مصطفی ٰ نے پالا ہے

جس نے اُن کا جمال دیکھا ہے

اوج ذوق ِ بلال دیکھا ہے

آپ کی رہ گزر کا ہر ذرہ

آفتاب ِ کمال دیکھا ہے

ان کو پایا ہے بے قرارِ کرم

جب بھی لب پر سوال دیکھا ہے

مٹنے والوں کو ان کی الفت میں

واقعی لازوال دیکھا ہے

دستگیری کو میری آہی گئے

جب بھی آشفتہ حال دیکھا ہے

جس کو مستی درود نے بخشی

بس اسے خوش خِصال دیکھا ہے

انبیاء صف بہ صف حضور امام

یہ بھی جاہ وجلال دیکھا ہے

بے مثالی کو ناز ہے جس پر

ہم نے وہ بے مثال دیکھا ہے

سفر طیبہ کی دعا دے گا

جس نے خاؔلد کا حال دیکھا ہے