ہر مرض کی دوا دُرود شریف
دافعِ ہر بلا درود شریف
وِرد جس نے کیا درود شریف
اور دل سے پڑھا درود شریف
حاجتیں سب روا ہوئیں اُس کی
ہے عجب کیمیا درود شریف
آفتابِ سپہر ایماں ہے
گوہرِ پُر ضیا درود شریف
آپ کے ساتھ حشر میں ہوگا
جس نے اکثر پڑھا درود شریف
جو محبِ جنابِ احمد ہے
اُس کا مونس ہوا دُرود شریف
اے صبا! تو ہی جا کے پہنچا دے
بر درِ مصطفیٰﷺ درود شریف
توشۂ راہ ِ آخرت کیجے
کافؔیِ بے نوا درود شریف
۔۔۔۔۔۔۔۔۔۔۔۔۔(دیوانِ کافؔی)
خوش آمدید