اتنے اوصاف ہیں محمدﷺ کے

کر نہ پائیں اگر شمار کریں

ان کی توصیف غیرممکن ہے

بس یہی کہہ کے اختصار کریں

دیکھ لی رب کے یار کی صورت

نکل آئی قرار کی صورت

ناامیدی کامنہ نہیں تکتی

ان کے امیدوار کی صورت

قابل دید اس کی صورت ہے

جس نے دیکھی ہے یار کی صورت

پڑ گئی جان غم کے ماروں میں

دیکھ کر غم گسار کی صورت

تھام لو دامن ِ محمد کو

بس یہی ہے قرار کی صورت

آئینے کو بنا گئی گلزار

اس سراپا بہار کی صورت

جب تک آئے نہ تھے رسول کریم

غیب تھی آشکار کی صورت

سر خرو کر گیا غمِ محبوب

دُھل گئی اشک بار کی صورت

دمِ آخر ہو رو برو خاؔلد

مدنی تاجدار کی صورت