بہ سلسلۂ گلبدنی

قارئین! آپ میری اِس نظم کو بہ اعتبارِ موضوع اوراسلُوبِ بیان میرے عام رنگِ سخن سے قطعی مختلف پائیں گے اس امر کی وضاحت ہے، ہُوا یُوں کہ جنابِ جوؔش ملیح آبادی کی نظم ’’گلبدنی‘‘ کی بڑی دھوم تھی ایک دن دورانِ ملاقات یہ نظم سننے کا اتفاق ہوا، دوسرے احباب بھی موجود تھے، جنابِ جوؔش کا اندازِ بیاں لکھنوی زبان کا رکھ رکھاؤ اور پھر ان کے پڑھنے کا انداز بڑا ہی لطف آیا، یہ غالباً 1971 یا 72 ء کی بات ہے، احباب نے فرمائش کی کہ میں بھی اسی انداز میں کچھ کہوں ہرچند یہ میرامذاق نہ تھا مگر

اصرارِ احبّا ناطق تھا، ناچار اِس راہ پڑا جانا

چنانچہ اپنی اِس نظم کو جوؔش صاحب کی گلبدنی کا ہمزاج بنانے کے لئے مجبوراً مجھے خود کو اُسی بے باکانہ اور رندانہ لب و لہجے سے آشنا کرنا پڑا، جو جنابِ جوش کی نظم کی خصوصیّت ہے ۔ نظم لکھنے کا مقصد احباب کی تکمیلِ فرمائش تھی، نہ کہ جنابِ جوش کی  قدرت ِ کلام اور زبان دانی کا مقابلہ  ۔ اُمیّد ہے کہ پڑھنے والے اِس نظم گلبدنی کو انہی معروضات کی روشنی میں دیکھیں گے

نصؔیر کان اللہ لہٗ

(عرشِ ناز)

کیا حُسن کا شہکار وہ اللہُ غنی ہے
قامت میں دل آویزیٔ سروِ چَمَنی ہے
سر تابہ قدم موجۂ شیریں سُخَنی ہے
وہ شیزۂ کہسار و غزالِ خُتَنی ہے
دانتوں کی چمک رُو کشِ دُرِّ عَدَنی ہے
کیا گل بَدَنی ، گل بَدَنی ، گل بَدَنی ہے
 شانوں پہ ہیں گیسو کہ گھٹائیں نیں مُعنبر
لب کیفِ تکّلم سے کھنکتے ہوئے ساغر
پیشانیِ ضَو بار ہے یا ماہِ منوَّر
ابرو ہیں کماں رنگ، مِژہ ناوکِ خود سر
مُکھڑے  پہ ہے جو خال ، عقیقِ یَمَنی ہے
کیا گل بَدَنی، گل بَدَنی، گل بَدَنی ہے
اَنفاس کی خوشبو ہے کہ مہکا ہوا گلشن
زلفوں کی گھٹی چھاؤں کہ اُمڈا ہُوا ساون
جھکتی سی نگاہیں تو اُبھرتا ہوا جوبن
بَجتے ہوئے پنڈے کے وہ ہر تار کی جَھن جَھن
چہرہ جو گلابی تو قبا ناروَنی ہے
کیا گل بَدَنی، گل بَدَنی، گل بَدَنی ہے
قامت کا خَم و چَم ہے کہ دجلے کی روانی
نقشِ کفِ پا رُو کشِ صد تاجِ کیانی
زلفوں کے سِیَہ ابر کی وہ عطر فشانی
گُل رنگ پسینے میں ہے غرقاب جوانی
جو بُوند ہے ماتھے پہ وہ ہِیرے کی کَنِی ہے
کیا گل بَدَنی، گل بَدَنی، گل بَدَنی ہے
انداز ہیں اعجاز، کرشمہ ہیں ادائیں
سُلجھائے جو گیسو تو اُلَجھی ہیں گھٹائیں
کلیوں کی چٹک ، لیتی ہے لہجے کی بَلائیں
مل جائے جو ہم کو تو کلیجے سے لگائیں
دل میں یہی بات جو مدّت سے ٹھنی ہے
کیا گل بَدَنی، گل بَدَنی، گل بَدَنی ہے
غمزے ہیں کہ آفت ہیں ، اشارے ہیں کہ طوفاں
باتیں ہیں کہ گھٹائیں ہیں، تبسّم کہ گلستاں
شوخی ہے کہ بجلی ہے، خموشی  ہے کہ پیکاں
چہرے پہ تجلّی ہے کہ ہے ماہِ زمستاں
سانسوں میں وہ لَپٹیں ہیں کہ جانوں پہ بَنی ہے
کیا گل بَدَنی، گل بَدَنی، گل بَدَ نی ہے
تیور ہیں کہ تلوار، ادائیں ہیں کہ خنجر
عشوے ہیں کہ نیزے ہیں، نگاہیں ہیں کہ نشتر
پلکیں ہیں کہ شب خُوں  پہ کمر بستہ ہے لشکر
یہ چینِ جبیں ہے کہ عُقُوبت گہِ محشر
قامت ہے کہ نیزہ ہے، نظر ہے کہ اَنی ہے
کیا گل بَدَنی، گل بَدَنی، گل بَدَنی ہے
ماتھے پہ پھبن، پھول سے ہونٹوں پہ تبسُّم
رخسار کے دریا  میں ہے جلووں کا تلاطُم
افکار میں نُدرت ہے تو لفظوں میں ترنُّم
لہجے میں تحمُّل ہے تو باتوں میں تحکمُّ
مہکائے ہوئے بزم کو عنبر دَہَنی ہے
کیا گل بَدَنی، گل بَدَنی، گل بَدَنی ہے
یہ مانگ میں افشاں ہے کہ رخشندہ ستارے
اُٹھتا ہوا جوبن ہے کہ مُڑتے ہوئے دھارے
تابندہ خَد و خال کہ رقصندہ شرارے
جُنبیدہ لَٹیں ہیں کہ چَکاروں کے طرارے
ساون کی سہ رات ہے یا زلف گھنی ہے
کیا گل بَدَنی، گل بَدَنی، گل بَدَنی ہے
چلتی ہے تو مِل جاتی ہیں راہوں کو زبانیں
چِھٹکاتی ہے جب زلف، برس پڑتی ہیں تانیں
آتی ہے جماہی تو درکتی ہیں چٹانیں
انگڑائی جو لیتی ہے، کڑکتی ہیں کمانیں
ابرو میں لیے جذبۂ ناوک فِگَنی ہے
کیا گل بَدَنی، گل بَدَنی، گل بَدَ نی ہے
وہ قہر سے دیکھے تو سمندر کو سُکھا دے
چاہے تو اداؤں سے پہاڑوں کو ہِلا دے
شوخی پہ جو اُترے تو دو عالم کو نچا دے
کیوں خانۂ عُشّاق کو پل بھر میں نہ ڈھا دے
کعبے میں جسے حوصلۂ نَقبِ زنی ہے
کیا گل بَدَنی، گل بَدَنی، گل بَدَ نی ہے
ہر بول میں ہے بادۂ گُل گُوں کی روانی
ہر مَوجۂ اَنفاس میں ہے زمزمہ خوانی
خوں ریز اشارے ہیں تو قاتل ہے جوانی
ہے جِھیل سی آنکھوں میں چمکتا ہُوا پانی
وہ شعلہ ہے جلوت میں تو خلوت میں بَنی ہے
کیا گل بَدَنی، گل بَدَنی، گل بَدَنی ہے
شوخی میں بھرے دولتِ دیرینہ قُطبَین
چوٹی میں  لپیٹے شبِ رعنائیِ دارَین
اُلٹے ہوئے گُھونگٹ تو اُتارے ہوئے نَعلَین
وہ بِنتِ قمر آگہی، لے داورِ کونین!
یہ دینِ مقدّس ہے، یہ دنیائے دَنی ہے
کیا گل بَدَنی، گل بَدَنی، گل بَدَنی ہے
غُنچے کا دِکھاتی ہے سماں تنگ دہانی
نُطق ایسا کہ بِپھرے ہوئے دریا کی روانی
اندازِ تخاطُب میں غُرورِ ہمہ دانی
الفاظ میں ہیں گوہرِ صد رنگ ِ معانی
اِن کا جو نہ قائل ہو وہ گردن زَدَنی ہے
کیا گل بَدَنی، گل بَدَنی، گل بَدَنی ہے
اُٹھتا نہیں گُھونگٹ کی طرف دستِ حنائی
ہر انگ لَجاتا ہے دمِ چہرہ کُشائی
نظروں کی گَرانی سے مُڑَکتی ہے کلائی
حاصل ہے جسے اِس درِ دولت کی گدائی
وہ خسروِ آفاق کی مانند غنی ہے
کیا گل بَدَنی، گل بَدَنی، گل بَدَ نی ہے
سن ہے جو ترو تازہ ت ورخسار ہیں شاداب
جِلد اِتنی ملائم کہ خَجِل قاقُم و سنجاب
پلکوں کے جھپکنے میں ہے آمادگیِ خواب
نظروں میں جو لہریں ہیں تو آنکھوں  میں ہے گرداب
شبنم کی دُلائی سی شبستاں میں تَنی ہے
کیا گل بَدَنی، گل بَدَنی، گل بَدَنی ہے
سرشار مناظر ہیں ، جنوں خیز ہوائیں
قاتل ہے تبسّم تو قیامت ہیں ادائیں
پہلو میں ہے وہ شوخ معطّر ہیں فضائیں
اِس وقت کہ گھِرتی چلی آتی ہیں گھٹائیں
ساغر کو پَٹک دوں تو یہ ایماں شکنی ہے
کیا گل بَدَنی، گل بَدَنی، گل بَدَنی ہے
دیکھو اُسے ہنگامِ برافگندہ نقابی
اک مُصحفِ تابندہ ہے یا رُوئے کتابی
نغمہ ہےنظر، آنکھ کے ڈورے ہیں رَبابی
کلیوں کی مہک جسم میں ، مُکھڑا ہے گُلابی
یہ شکل و شباہت نہ بنے گی ، نہ بَنی ہے
کیا گل بَدَنی، گل بَدَنی، گل بَدَ نی ہے
آہنگِ جوانی پہ سماوات ہیں رقصاں
آواز ہے اک نغمہ ،  تو لہجہ گُلِ خنداں
بنیادِ دو عالم ہے اشارات سے لرزاں
 مَسقَط دلِ عُشّاق کا ہے چاہِ زنخداں
وہ مَوجۂ تابندگیِ سیم تَنی ہے
کیا گل بَدَنی، گل بَدَنی، گل بَدَنی ہے
تھم جائے وہیں، دیکھے اگر گردشِ دوراں
ہو واعظِ بے چارہ بھی انگشت بدنداں
الحاد کے زانُو ہے سویا ہُوا ایماں
اعلانِ خدائی ہے لبِ کفر پہ غلطاں
اب اے جسے دلولۂ بُت شِکَنی ہے
کیا گل بَدَنی، گل بَدَنی، گل بَدَنی ہے
کچھ غم نہیں اُلفت میں جو دن رات کراہیں
چبھتی رہیں سینے وہ بے باک نگاہیں
دُھن ہے کہ گلے میں رہیں وہ پھول سی بانہیں
کیونکر نہ نصؔیر اُس بتِ نو خیز کو چاہیں
رگ رگ میں رچی عاشقی و برہمنی ہے
کیا گل بَدَنی، گل بَدَنی، گل بَدَنی ہے
(عرشِ ناز)