کیا کیا نہ ملا رابطہءِ سرور دیںﷺ سے

ہر کام نوازا ہے ہمیں فتح ِ مبین سے

پہچان لئے جائیں گے محشر میں یہ سورج

سجدوں کے نشانات نمایاں ہیں جبیں سے

وہ رحمتِ کونین ہیں محدود نہیں ہیں

پایا بھی یہیں ان کو پکارا بھی یہیں سے

ہے قبلہء حاجات درِ احمد ِ مختارﷺ

جو کچھ ہمیں ملتا ہے وہ ملتا ہے یہیں سے

سرکارﷺ کے قدموں میں جگہ مل گئی جن کو

افلاک کی نسبت وہی رکھتے ہیں زمیں سے

تابانیء خورشید و قمر ان پہ تصدق

جن ذروں کو نسبت ہے مدینے کی زمیں سے

پوچھے کوئی خاؔلدسے ہے کیا نعت کا فیضان

دن رات پیام آتے ہیں فردوس بریں سے