لکھوں کیا وصف میں شیرِ خدا کا
علی اعلیٰ درِ خیبر کُشا کا

زیادہ فکر و فہم و عقل سے ہے
ثنائے ابنِ عمِّ مصطفیٰﷺ کا

علی ہے پیشوا، ہادیّ و مولا
تمامی امّتِ خیر الورا کا

درِ حیدر کا جو کوئی گدا ہو
نہ ہو محتاج وہ ظِلِّ ہُما کا

کہیں کیوں کر نہ ہم ’’مولا‘‘ علی کو
کہ ہے ارشاد ختم الانبیا کا

شرف کحل الجواہر پر رکھے ہے
یہ رتبہ ہے علی کی خاکِ پا کا

تولّد وہ ہوئے کعبے کے اندر
عجب رتبہ ہے شاہِ لافتا کا

ہوا اُس سے منوّر قصرِ عرفاں
وہ ہے سلطان ملکِ اولیا کا

فضائل ھَلْ اَتٰی سے ہے ہُوَیْدا
سزاوارِ خطابِ قُلْ کَفٰی کا

یہ کافؔی تو گدائے خاکِ پا ہے
جنابِ مستطابِ مرتضیٰ کا
۔۔۔۔۔۔۔۔۔۔۔(دیوانِ کافؔی)