دل کو کیف و سرور ملتا ہے
قُرب ِ رَبِّ غفور ملتا ہے
تجربہ ہے نبی کی چوکھٹ ہے
جوبھی مانگو ضرور ملتا ہے

میں کچھ نہ سہی میرا مقدر تو بڑا ہے

سنگ ِ درِ محبوب پہ سر میرا جھکا ہے

کیا خوب صلہ نعتِ محمد کا ملا ہے

میزانِ محبت پہ ہر اک شعر تُلا ہے

سرکار کے قدموں کے نشاں ڈھونڈ رہا ہے

جو اشک ِ محبت مری آنکھوں سے گرا ہے

سایہ جسے دامان ِ محمد کا ملا ہے

قید غمِ کونین سے آزاد ہوا ہے

یہ ذرہ جسے آج سبھی کہتے ہیں خورشید

خاک ِ قدم سرور عالم سے اُڑا ہے

اب ہیچ نظر آتی ہے سب دولتِ کونین

دامانِ طلب یوں تیری رحمت نے بھرا ہے

کیوں میری خطاؤں کی طرف دیکھ رہے ہو

جس کو ہے مری لاج وہ لچپال بڑا ہے

آسودہ نظر آتا ہے ہر ایک کرم سے

جو سرورِ کونین کے کوچے کا گدا ہے

جینے کا ملا ہے تری سیرت سے قرینہ

قرآنِ مجسم تری ہر ایک ادا ہے

یہ شفقت و رحمت ہے ہر اک دلِ مایوس،

بخشش کا یقین لے کے ترے در سے اُٹھا ہے

ہٹتی نہیں سرکار کی سیرت سے نگاہیں

ہر وقت مرے سامنے قرآن کھلا ہے

کرتے ہیں نکیرین ادب میرا لحد میں

مٹ کر تری الفت میں یہ اعزاز ملا ہے

دامن میں چھپا لو کہ پیشمان ہے خاؔلد

آخر یہ تمہارا ہے بُرا ہے کہ بھلا ہے