مِلکِ خاصِ کبریا ہو
مالکِ ہر ما سوا ہو

کوئی کیا جانے کہ کیا ہو
عقلِ عالَم سے ورا ہو

کنزِ مکتومِ ازل میں
دُرِّ مکنونِ خدا ہو

سب سے اوّل سب سے آخر
ابتدا ہو انتہا ہو

تھے وسیلے سب نبی، تم
اصلِ مقصودِ ہُدیٰ ہو

پاک کرنے کو وضو تھے
تم نمازِ جاں فزا ہو

سب بِشارت کی اذاں تھے
تم اذاں کا مُدّعا ہو

سب تمھاری ہی خبر تھے
تم مؤخّر مبتدا ہو

قربِ حق کی منزلیں تھے
تم سفر کا مُنتہیٰ ہو

قبلِ ذکر اضمار کیا جب
رتبہ سابق آپ کا ہو

طورِ موسیٰ چرخِ عیسیٰ
کیا مُساوِیِّ ’’دَنٰی‘‘ ہو

سب جہت کے دائرے میں
شش جہت سے تم ورا ہو

سب مکاں، تم لا مکاں میں
تن ہیں، تم جانِ صفا ہو

سب تمھارے در کے رستے
ایک تم راہِ خُدا ہو

سب تمھارے آگے شافِع
تم حضورِ کبریا ہو

سب کی ہے تم تک رسائی
بارگہ تک تم رسا ہو

وہ کَلَس روضے کا چمکا
سر جھکاؤ کج کُلاہو

وہ درِ دولت پہ آئے
جھولیاں پھیلاؤ شاہو

حدائق بخشش