صدرِ بزمِ کثرت ، یا رسول اللہﷺ

رازدارِ وحدت ، یا رسول اللہﷺ

ہر جہاں کی رحمت ، یا رسول اللہﷺ

بہترین خلقت ، یا رسول اللہﷺ

نعرۂ رسالت یا رسول اللہﷺ

محوِ خوابِ غفلت ، یا رسول اللہﷺ

ہوگئی یہ امت ، یا رسول اللہﷺ

سو یا بختِ ملت ، یا رسول اللہﷺ

کیجئے عنایت ، یا رسول اللہﷺ

نعرۂ رسالت یا رسول اللہﷺ

صاحب ہدایت ، یا رسول اللہﷺ

چھایا ابرِ ظلمت ، یا رسول اللہﷺ

ناتواں ہے امت ، یا رسول اللہﷺ

کیجئے حمایت ، یا رسول اللہﷺ

نعرۂ رسالت یا رسول اللہﷺ

درپئے شرارت ، یا رسول اللہﷺ

کفر کی جماعت ، یا رسول اللہﷺ

ناتواں ہے امت ، یا رسول اللہﷺ

کیجئے حمایت ، یا رسول اللہﷺ

نعرۂ رسالت یا رسول اللہﷺ

مالکِ شفاعت ، یا رسول اللہﷺ

بیکسوں کی طاقت ، یا رسول اللہﷺ

میزبانِ امت ، یا رسول اللہﷺ

ایک جامِ شربت ، یا رسول اللہﷺ

نعرۂ رسالت یا رسول اللہﷺ

آپ کی اطاعت ، یا رسول اللہﷺ

وہ خدا کی طاعت ، یا رسول اللہﷺ

جس کو ہو بصیرت ، یا رسول اللہﷺ

دیکھے شانِ قربت ، یا رسول اللہﷺ

نعرۂ رسالت یا رسول اللہﷺ

دید کے ہوں طالب جب خدا سے موسیٰ

ان سے لَنْ تَرَانِیْ کہہ دے رب تمہارا

پر تمہارے رب سے تم کو میرے مولیٰ

ہے پیامِ وصلت ، یا رسول اللہﷺ

نعرۂ رسالت یا رسول اللہﷺ

کرنا تھا خدا کو ہم پہ آشکارا

آخری نبی ہے اس کو سب سے پیارا

کوئی بھی نبی ہو پچھلی امتوں کا

تم کو سب پہ سبقت ، یا رسول اللہ

نعرۂ رسالت یا رسول اللہﷺ

تم کو جو بتائے اپنا جیسا انساں

کور چشم ہے وہ دو جہاں کے سلطاں

دیو کا ہے بندہ وہ عدوِّ رحماں

جس کو تم سے نفرت ، یا رسول اللہﷺ

نعرۂ رسالت یا رسول اللہﷺ

تم ہو نورِ یزداں شمعِ بزمِ امکاں

تم ہو و جہِ ہر شے دہر کی رگ جاں

تم سے کوہ و صحرا تم سے یہ گلستاں

تم بقاءِ خلقت ، یا رسول اللہﷺ

نعرۂ رسالت یا رسول اللہﷺ

دہر میں ہے کیا شے تم سے جو نہاں ہے

تم پر حالِ اخترؔ بالیقیں عیاں ہے

بس مری خموشی ہی مری زباں ہے

کیا کروں شکایت ، یا رسول اللہﷺ

نعرۂ رسالت یا رسول اللہﷺ