روشن زمیں ہوئی تو حسیں آسماں ہوا
نورِ رخِ نبیﷺ سے منور جہاں ہوا
صد شکر اے وفورِ مسرت کے آنسوؤں
دامانِ عشق غیرتِ ہفت آسماں ہوا
مٹ کے غبار راہ دیار نبیﷺ بنا
میں یوں شریک قافلئہ کہکشاں ہوا
کیا خوب ہے کمال تصرف کی یہ مثال
پروردۂ نبیﷺ پہ خدا کا گماں ہوا
چشم علی میں کیوں نہ ہوں یکساں شہود و غیب
زیب نگاہ کحل لعاب دہاں ہوا
نعت رسولﷺ آیۂ رحمت کا ہے کرم
میں ہم زبان انجمن قدسیاں ہوا
اخؔتر یہ راز فہم بشر کیا سمجھ سکے
کیسے مکان^(۱) زیب دۂ لامکاں ہوا
 

مکان  سے مراد آپﷺ کا لباس بشری ہے۔ نور محمدیﷺ جس میں مکین ہے