رخِ حبیبِ خدا ہے دو عالَم آرا چاند
کہ جس کے نور سے روشن ہے ہر ستارا چاند

ظہورِ نورِ رسولِ خدا^ﷺ کے باعث سے
ہوا ہے مہرِ درخشان و آشکارا چاند

سپہر حسن پہ روئے شریف کے آگے
سہا کی شکل ہے ادنیٰ سا ایک تارا چاند

جبیں کے نور پہ خورشید لاکھ بار نثار
بلالِ ناخنِ پائے نبی^ﷺ پہ وارا چاند

تجلّیِ شبِ معراج کی نہ لایا تاب
فلک سے گر گیا اُس رات میں کنارا چاند

بجز اشارۂ انگشتِ صاحبِ لَوْلَاک
دو بارہ پھر نہ فلک پر ہوا دو پارا چاند

پڑی ہے شرق سے تا غرب دھوم، اے کافؔی!
کہ آسمان سے سوئے زمین اتارا چاند
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)