شبِ ولادتِ ختمِ پیغمبراں ہے آج
شبِ ولادتِ سردار سروَراں ہے آج

شبِ ولادتِ مخدومِ مُرسَلاں ہے آج
شبِ ولادتِ مقصودِ کُنْ فَکَاں ہے آج

شبِ ولادتِ محبوبِ کبریا ہے آج
شبِ ولادتِ ممدوحِ قدسیاں ہے آج

حبیبِ خاصِ خدا کی ہے یہ شبِ میلاد
شبِ ولادتِ سلطانِ انس و جاں ہے آج

وُحوش و طیر تھے جس شب بہم نوید رساں
یہ وہ شبِ شرف افزائے ہر مکاں ہے آج

یہ رات ہے شبِ میلادِ رحمتِ عالَم
تمام عالَمِ اِمکان شادماں ہے آج

کیا ہے فصلِ بہاری نے ہر چمن میں ظہور
نسیمِ فیض سے ہر باغ گُل فشاں ہے آج

زمین مہبطِ نورِ سر در حسن شب
یہ وہ شبِ سببِ عیش جاوداں ہے آج

شبِ دوازدہم یہ ربیع الاوّل ہے
شبِ ولادتِ فخرِ جہانیاں ہے آج

بفیضِ ذکرِ شبِ مولدِ رسولِ کریم^ﷺ
گُہر فشاں لبِ مدّاحِ ہر زماں ہے آج

ولادتِ نبوی کی خوشی میں، اے کافؔی
ہر اہلِ محفلِ مولود دُرود خواں ہے آج
۔۔۔۔۔۔۔۔۔۔۔۔۔۔۔۔۔۔۔۔(دیوانِ کافؔی)