بندگی کا سرور ملتا ہے
دیدۂ دِل کو نور ملتا ہے
ذِکر سرکار سے خدا کی قسم
زندگی کا شعور ملتا ہے

ان کی یاد میں رہتا ہوں اور مجھے کچھ کام نہیں

سارے اچھے نام ہیں ان کےمیرا کوئی نام نہیں

ان کی یاد کا احساں ہے فکر ِ صبح و شام نہیں

بن مانگے ہر چیز ملی ہے محرومی کا نام نہیں

ہم نے تو دیکھی ہی نہیں صورت ہی نا کامی کی

ان کا کرم ہو جائے تو مشکل کوئی کام نہیں

جتنا جس کا ظرفِ طلب دیا اس کا پیمانہ

بطحا کے میخانے میں کوئی تشنہ کام نہیں

غم بھی ہے راحت ساماں دل کی دھڑکن اک پیغام

درد تمہارا درماں ہے دل وقفِ آلام نہیں

ان کی چوکھٹ پر ہو سر اور سفر ہو دنیا سے

وہ ہستی کیا ہستی ہے جس کا یہ انجام نہیں

ہر سو جا کر دیکھ لیا بربادی مایوسی ہے

اپنے پاس بلا لیجئے اور کہیں آرام نہیں

بیکل ہو کر شاد بھی ہے جلووں سے آباد بھی ہے

دل میں ان کی یاد بھی ہے کوئی تڑپ نا کام نہیں،

صدقہ ان کی آنکھوں کا مستی سارے عالم کی

یہ میخانہ ایسا ہے جس میں شرطِ جام نہیں

طیبہ تک محدود نہیں ان کا جلوہ اے واعظ

وہ تو یہاں بھی ہیں لیکن دید مذاق ِ عام نہیں

جس کو ان کا درد ملا ساری کائنات ملی

اس سے بڑھ کر اللہ کا اور کوئی انعام نہیں

جب سے تیرے دامن نے بخشی ہے بھر پور اماں

میری جانب اے آقا کوئی رُخ ِ الزام نہیں

میرے تڑپنے کی خاؔلد ان کو خبر ہو جاتی ہے

عرض مری سن لیتے ہیں کوئی تڑپ نا کام نہیں