خَمریات

واعظ! مجھے جنّت کا طلب گار نہ کر
جو بس  میں نہیں تیرے، وہ اِقرار نہ کر
گو رِندی و مستی نہیں تیرا مَسلک
ساقی کے تَبُّرک سے تو انکار نہ کر

اُمّیدِ سعادت کی کر ٹُوٹ گئی
نبضِ وقتِ شگفتی چُھوٹ گئی
ساقی نے کہا، ذرا تَوقُّف اے رِند!
اِتنے میں جو دیکھا تو کِرن پُھوٹ گئی

خاکِ درِ میخانہ کا ہے ہر ذرّہ ہے پاک
اِس خِطّے پہ قُرباں ہے فضائے اَفلاک
تخلیق کی نس نس میں ہے صَہبا کی نمی
ہر ریشۂ زِیست میں ہے خونِ رگِ تاک

ہے عشق کی مستی ہی میں دانش مَستور
دُردِ تہِ یک جام ہیں ادراک و شُعُور
چھینٹے ہیں شراب کے نُجُوم و مَہ و مِہر
فیضان ہے ساقی کا یہ سب نُور و ظُہُور

میخانے کا ہر ذرّہ ہے تُحفہ ، سوغات
رِندی و سیہ مستی ہے اصلِ حَسَنات
ہر شیشہ ہے نُورِ نظرِ کا ہکشاں
ہر بُوند ہے لخت ِ جگرِ آبِ حیات

جب محفلِ جَم ، جام سے جَم جاتی ہے
گردش سحر و شام کی تَھم جاتی ہے
جب جُھوم کے گُھونٹ گُھونٹ پیتا ہُوں مَیں
تا عرش دُعا قدم قدم جاتی ہے

موجیں ٹھہریں خُنک کناروں کی طرح
قطروں کی اُڑان ہو غُباروں کی طرح
ساقی کا نشانِ پا جو دَمکے سرِ راہ
ذرّات نکھر جائیں ستاروں کی طرح

مُحتاط بھی خاکِ خُم میں دَھنستے دیکھے
مغموم بھی میخانے میں ہنستے دیکھے
رِندوں ہی پہ موقوف نہیں گردشِ جام
زُہّاد بھی اِس دام میں پھنستے دیکھے

مے گُلشنِ ایجاد میں ہے وجہِ نَمُو
ہے شہ رگِ ہستی میں رواں خُم کا لُہُو
ہر لغزشِ مستانہ ہے منزل کا نشاں
مِٹتا ہے جامِ مَے سے فرقِ من و تُو

رِندوں پہ اگر بابِ کرم کُھل جائے
اک گُھونٹ ہی میں راہِ حرم کُھل جائے
تُل جائے پلانے پہ جو چشمِ ساقی
ہر صُوفی و زاہد کا بھرم کُھل جائے

چُھپتا نہیں نظروں سے کوئی زِشت نہ خُوب
پیشانی  پہ مکتوب ہیں اسرارِ قُلُوب
ہے صاف ضمیری کا نشاں حق گوئی
آئینہ چُھپاتا  نہیں چہرے کے عُیُوب

کیوں دیدۂ عالَم سے چُھپا کر پی لُوں
کیوں سب کی نگاہون سے بچا کر پی لُوں
ساقی ! ترے قُربان ، اجازت ہو اگر
میخانہ کو مَیں سَر پہ اُٹھا کر پی لُوں
(عرش ِناز)